ខេត្តកំពង់ស្ពឺ៖ បុរសល្មោភកាមម្នាក់ ប៉ុនប៉ងចាប់រំលោភកូនស្រី របស់ប្ដីដើម តែត្រូវប្រពន្ធមកទាន់ ក៏ស្ដីបន្ទោសឲ្យ បែរជាបង្កនូវអំពើហិង្សា ទើបសមត្ថកិច្ចចុះទៅឃាត់ខ្លួន កាលពីវេលាម៉ោង ៧ និង៣០យប់ ថ្ងៃទី៨ ខែឧសភា ឆ្នាំ២០១៨ ស្ថិតក្នុងភូមិព្រៃស្រូល ឃុំពោធិ៍អង្គ្រង ស្រុកបសេដ្ឋ។
បើតាមសម្ដីម្ដាយក្មេងស្រីរងគ្រោះ បានប្រាប់សមត្ថកិច្ចថា មុនពេលកើតហេតុ គាត់បានទុកកូនស្រី ឱ្យនៅជាមួយប្តីក្រោយរបស់គាត់ ហើយទៅធ្វើការ នៅក្នុងរោងចក្រកាត់ដេរបាត់ រហូតដល់ពេលយប់ ទើបគាត់ត្រឡប់មកផ្ទះវិញ។ ប៉ុន្តែមានថ្ងៃមួយ នៅពេលគាត់ត្រឡប់មកដល់ផ្ទះ ស្រាប់តែឃើញប្តីក្រោយ របស់គាត់កំពុងធ្វើសកម្មភាព បៀតបៀនកេរ្ដិ៍ខ្មាសកូនស្រីរបស់គាត់ ដែលជាកូនរបស់គាត់ជាមួយប្តីមុន។
ឃើញដូច្នេះ គាត់បានស្តីបន្ទោសប្ដីក្រោយរបស់គាត់ថា ម្ដេចក៏មានគំនិតអាក្រក់ ចង់ធ្វើបាបក្មេងស្រី មិនដឹងអីបែបនេះទៅវិញ? ឮបែបនេះ ស្រាប់តែប្ដីក្រោយរបស់គាត់ បានផ្ទុះកំហឹងយ៉ាងក្រេវក្រោធឡើង ស្ទុះមកវាយគាត់ បណ្តាលឱ្យរងរបួស។ ដោយសារតែទង្វើដ៏លាមក របស់ប្តីក្រោយនេះ មិនអាចអត់ឱនឲ្យបាន ទើបគាត់រត់មកប្តឹងសមត្ថកិច្ចឲ្យឃាត់ខ្លួនប្ដីក្រោយរបស់គាត់ នាំទៅចាត់ការតាមច្បាប់។
អាណាព្យាបាលរបស់ក្មេងស្រីរងគ្រោះ បានបន្តថា កូនស្រីរបស់គាត់ គឺជាកូនជាមួយនឹងប្ដីទី១ ប៉ុន្តែក្រោយពេលលែងលះគ្នារួចមក គាត់ក៏បានយកប្តីក្រោយនេះ អស់រយៈពេល៣ឆ្នាំមកហើយ ដោយមិនបានរៀបការអ្វីឡើយ។ ការយកប្តីក្រោយនេះ គឺគាត់សង្ឃឹមថានឹងគ្រាន់បានជាបង្គោល នៅក្នុងគ្រួសារ និងជួយរកស៊ី តែចុងក្រោយ បានត្រឹមដំបៅទ្រូង លើសដើមទៅវិញ។
មន្ត្រីនគរបាលស្រុកបសេដ្ឋ បានឲ្យដឹងថា ជនសង័្សយជាប់ពាក់ព័ន្ធនឹងករណីបៀនបៀនកេរ្ដិ៍ក្មេងស្រី ហើយត្រូវសមត្ថកិច្ចឃាត់ខ្លួននោះ ឈ្មោះ ឆាយ លក្ខិណា អាយុ៣១ឆ្នាំ ។ រីឯក្មេងស្រីរងគ្រោះ ឈ្មោះ ប ក អាយុ៦ឆ្នាំ។ ពួកគេទាំង២នាក់ត្រូវជាឪពុកចុង និងកូនដើម ហើយមានលំនៅក្នុងភូមិភូមិព្រៃស្រូល ឃុំពោធិ៍អង្គ្រង ស្រុកបសេដ្ឋ ខេត្តកំពង់ស្ពឺ
លោកវរសេនីយ៍ទោ យ៉ាង សុខលី អធិការនគរបាលស្រុក បានឲ្យដឹងថា បន្ទាប់ពីទទួលបានពាក្យបណ្ដឹង ពីអាណាព្យាបាលរបស់ជនរងគ្រោះភ្លាម សមត្ថកិច្ចរបស់លោក បានចុះទៅឃាត់ខ្លួនជនសង្ស័យ នាំមកកាន់អធិការដ្ឋាន នគបាលស្រុក ដើម្បីសាកសួរ និងកសាងសំណុំរឿង បញ្ជូនទៅការិយាល័យនគរបាល ប្រឆាំងការជួញដូរ និងការពារអនីតិជន នៃស្នងការដ្ឋាននគបាលខេត្ត ដើម្បីចាត់ការតាមនីតិវិធី៕
0 comments:
Post a Comment